İlk və tək dövlət sığorta şirkəti olan “Azərsığorta” filial şəbəkələrinin optimallaşdırılması prosesinə davam edir. Bölgələrdəki regional mərkəzlərinin sayını artıran Şirkətin Gəncə şəhərində yerləşən və yeni konsepsiyaya uyğun transformasiya olunan filialının açılışı olub.
Gəncə şəhəri, Heydər Əliyev prospekti 325 ünvanında yerləşən yeni filial vətəndaşlara yüksək xidmət göstərmək üçün zəruri olan bütün imkanlara sahibdir. Gəncə şəhəri ilə yanaşı ətraf rayon və şəhərlərdə yaşayan əhali də bu filiala yaxınlaşaraq Şirkətin təklif etdiyi bütün növ sığorta xidmətlərindən istifadə edə biləcəklər.
Şirkətin İdarə Heyəti sədrinin müşaviri Ceyhun Qurbanlı və bir sıra nümayəndə heyətinin iştirakı ilə baş tutan açılış mərasimində Gəncə şəhərinin vətəndaşları da qəbul edilmiş, ilk gündən artıq vətəndaşlara xidmət göstərilmişdir.
Qeyd edək ki, 21 oktyabr 1921-ci ildə Azərbaycan SSR-də yerli Dövlət Sığorta İdarəsi kimi fəaliyyətə başlayan “Azərsığorta” Dövlət Sığorta Kommersiya Şirkəti Cənubi Qafqazın ilk sığorta qurumu olaraq 1991-ci ildə Azərbaycan Respublikasının Maliyyə Nazirliyi yanında fəaliyyət göstərən Dövlət Sığortası İdarə heyəti bazasında Azərbaycan Respublikası Dövlət Sığorta Kommersiya Şirkəti olaraq yaradılıb.
2022-ci il may ayından etibarən “Azərsığorta” brendi ilə fəaliyyətini uğurla davam etdirən Şirkət 36 növdə könüllü və icbari sığorta məhsulları üzrə xidmətlər təqdim etməklə respublikada geniş filial şəbəkəsinə malikdir.
